< ត្រឡប់ទៅធនធានទាំងអស់
តម្រៀបកែវជ័រជាក្រុម
-
ចិត្តចលភាព -
សិក្សាសង្គម -
បុរេគណិត
ល្បែង៖ តម្រៀបកែវជ័រជាក្រុម
កម្មវិធីសិក្សា៖
ចិត្តចលភាព៖ បំណិនចលកតូច (ការហ្វឹកហាត់បង្កើនកម្លាំង សម្របសម្រួលសាច់ដុំដៃ និងភ្នែកសាច់ដុំភ្នែក)
សិក្សាសង្គម៖ គំនូរនិងសកម្មភាពកសាង៖ ការយល់ដឹងនិងការពេញចិត្តចំពោះសិល្បៈតាមរយៈការបង្កើតរូបភាព៖
បុរេគណិត៖ រង្វាស់រង្វាល់៖ បញ្ញត្តិស្ដីពីរង្វាស់រង្វាល់៖
រយៈពេល៖ ៣០ នាទី
ឧបករណ៍៖ កែវជ័រដែកលមានសភាពរឹងបន្តិច រឹងខ្លាំងកាន់តែល្អ ខ្សែអ្វីក៏បានដែរ ដែលមានទំហំតូចល្មម និងកៅស៊ូកង និងអ្វីក៏បានដែរឱ្យតែមានសភាពយឺតៗ។
គោលបំណង៖
(ចិត្តចលភាព) ប្រាប់ពីររបៀបធ្វើចលនាដៃតាមទម្រង់ផ្សេងៗដោយការធ្វើអ្វីមួយ ឬលេងល្បែង។ បង្ហាញពីរបៀបធ្វើសកម្មភាពទៅតាមទម្រង់ផ្សេងៗនៃសកម្មភាពរួមមួយ។
(សិក្សាសង្គម)៖ ប្រាប់បានពីការបត់ រោយ ដេរ ត្បាញ សូនរូប គូរ ផាត់ពណ៌ ហែក កាត់ បិទ បត់… និងបង្កើតរួបភាពផ្សេងៗ។
(បុរេគណិត): ប្រាប់បានពីបញ្ញតិ្តខ្ពស់ និងទាប វែងនិងខ្លី ធ្ងន់និងស្រាល ច្រើននិងតិច មាននិងមិនមាន ពេញនិងកន្លះ…។
ត្រៀម៖ ធ្វើសម្ភារ១ឬ២ឈុតសម្រាប់បង្ហាញកុមារមុនពេលដែលត្រូវលេងល្បែងសកម្មភាពមួយនេះ។
សេចក្ដីណែនាំ៖
១. ប្រាប់ក្មេងថាថ្ងៃនេះពួកគេនឹងលេងល្បែងសកម្មភាពមួយដែលមានចំណងជើងថា ល្បែង តម្រៀបកែវជ័រជាក្រុម។
២. ប្រាប់កុមារថាលេងល្បែងសកម្មភាពនេះត្រូវមានសម្ភារអីខ្លះ? សម្ភារមានដូចខាងលើ។
៣. ប្រសិនបើមានពេលច្រើននោះ អាចបង្រៀនកុមារឱ្យចេះពីរបៀបធ្វើវាក៏បាន៖
- ប្រើកែវជ័ររឹងមួយចំនួន កាន់តែច្រើនកាន់តែល្អ
- ប្រើខ្សែដែលមានប្រវែងប្រហែលជា ៧០សង់ទីម៉ែត្រ ចំនួន៤ ឬ៥ ក្នុងមួយក្រុម ទៅតាមចំនួនកុមារក្នុងក្រុមនីមួយៗ
- ខ្សែចងជុំវិញកៅស៊ូ ដែលមានចន្លោះល្មមដូចក្នុងរូប។
៤. បែងចែកកុមារទៅជាក្រុមនីមួយៗដែលមានចំនូន៤ឬ៥នាក់ក្នុងមួយក្រុម
៥. ពង្រាយកែវជ័រទាំងអស់នៅលើតុមួយ តាមក្រុមនីមួយដែល ចំនួនតាម
រការបៀបចំរបស់អ្នក។
៦. ឱ្យក្រុមនីមួយៗប្រណាំងគ្នា ដោយតម្រៀបកែវឱ្យបានអស់មុន និងខ្ពស់ជាងគេ
៧. កំណត់នាទីសម្រាប់ការលេងល្បែងនេះដោយបានសមរម្យ
៨. នៅពេលដែលក្រុមណាដែលធ្វើដួល ត្រូវចាប់ផ្ដើមម្ដងទៀត ធ្វើបន្តរហូតដល់អស់នាទីដែលបានកំណត់ពីខាងលើ។
៩. កុមារត្រូវទាញខ្សែដែលនៅនឹងដៃរបស់ខ្លួននីមួយៗបន្តិច ដើម្បីឱ្យបានពន្លាក្នុងការចាប់យកកែវជ័រនោះ ម្ដងមួយៗ។
១០. គ្រាន់តែលេងប៉ុណ្ណឹងជាការស្រេច និងប្រាប់កុមារឱ្យជួយរៀបចំកន្លែង ហើយរៀបចំឱ្យរៀបរយ។
ការប្រែប្រួល៖
- ល្បែងនេះអាចលេងជាក្រុមដោយប្រកួតប្រជែងក៏បាន ឬលេងធម្មតាក៏បានដែរ។
- ល្បែងនេះអ្នកអាចឱ្យកុមារលេងបែបមួយផ្សេងទៀតក៏បានដែរ ដូចជា៖
១. ក្នុងក្រុមនីមួយៗត្រូវសហការគ្នាចាប់កែវជ័រមកផ្គុំជាសសរដែលមានកម្ពស់ និងត្រូវតែមិនដួលទៀតផង។
២. អ្នកត្រូវកំណត់នាទីក្នុងការល្បែងសកម្មភាពនេះដូចខាងលើដែរ។
៣. ប្រសិនបើគ្រប់នាទីហើយ ត្រូវប្រាប់ឱ្យកុមារទាំងអស់ក្រុមឈប់ និងរាប់កែវ ហើយនិងខ្ពស់ជាងគេ គឺក្លាយជាក្រុមដែលឈ្នះតែម្ដង។
- វិធីមួយទៀត៖ អ្នកអាចលេងជាបែបកែវពណ៌វិញក៏បានដែរ គឺចាប់គូកែវដែលមានពណ៌ដូចគ្នា៖
១. ដាក់កែវជ័រដែលមានពណ៌ច្រើន ហើយដែលមានពណ៌ដូចគ្នា២ ២ មានន័យពណ៌ជាគូៗតែម្ដង។
២. កុមារក្នុងក្រុមនីមួយៗត្រូវប្រណាំងគ្នា រៀបឬចាប់កែវដែលមានពណ៌ដូចគ្នាដាក់គ្របពីលើគ្នា ឱ្យអស់ មុនពេលដល់ពេលវេលាដែលបានកំណត់។
៣. កំណាត់១ ឬ២ នាទីទៅតាមចំនួនកែវជ័រដែលមានសម្រាប់ក្រុមនីមួយៗ។
៤. ត្រូវប្រើខ្សែដែលបានធ្វើរួចនោះតែប៉ុណ្ណោះ មិនអាចចាប់ដោយប្រើដៃផ្ទាល់បាននោះទេ។
៥. លេងបែបហ្នឹងជាការស្រេចនៅក្នុងការលេងល្បែងសកម្មភាពមួយនេះ។