< ត្រឡប់ទៅធនធានទាំងអស់
ល្បែងប្រណាំងវាយកូនបាល់ចូលកន្រ្តក
-
ចិត្តចលភាព -
បុរេគណិត
សកម្មភាព ៖ ល្បែងប្រណាំងវាយកូនបាល់ចូលកន្រ្តក
ចិត្តចលភាព៖ បំណិនចលនាធំ៖ ការហ្វឹកហាត់បង្កើនកម្លាំងសម្របសម្រួលរវាងចលនាសាច់ដុំតូចនិងសាច់ដុំធំ
ការរីកចម្រើនរាងកាយនិងចលនា៖ ការបង្កើតកម្លាំងនិងប្រឈមទប់ទល់នឹងឧបសគ្គក្នុងពេលធ្វើសកម្មភាព
បុរេគណិត៖ បរិមាណនិងចំនួន៖ ស្គាល់និងយល់លេខតាងនិងការគណនាសាមញ្ញ
គោលបំណង ៖
ចិត្តចលភាព៖ ប្រាប់បានពីរបៀបវិធីដើរ រត់ លូន លោត ចុះឡើង បោះ តោង ឡើង គប់ បង្វិល រមៀល រុញ និងទាញ ទៅតាមគោលដៅនិងចម្ងាយដែលបានកំណត់រួច។
អនុវត្តសកម្មភាពមួយបានយ៉ាងទន់ភ្លន់ រហ័សរហួននិងរឹងមាំដោយផ្ដើមចេញពីចលនាមូលដ្ឋានងាយៗ ទៅលំបាក ចំនួនពីរឡើងទៅ ក្នុងនោះមានការដើរ រត់ លូន ឬលើសពីនេះតាមរយៈចលនាចរន្ត ហាត់ប្រាណតាមរឿងនិទាន បទចម្រៀង បទភ្លេងនិងល្បែងនានា។
បុរេគណិត ៖ ប្រាប់បានពីចំនួន លេខនិងយល់ន័យពីលេខ១ ដល់៣១ តាមលំដាប់លំដោយ ឬលើសពីនេះ។
រយៈពេល ៖ ៣០ នាទី
ឧបករណ៍ ៖ ប៉ោងប៉ោងមួយចំនួនល្មមនឹងសម្រាប់លេងល្បែងនេះ រ៉ាកែតវាយសី សម្រាប់វាយប៉ោងប៉ោងនិងកន្រ្តកមួយចំនួនតាមចំនួនក្រុម។ ប្រសិនបើអ្នកមិនច្បាស់ក្នុងការធ្វើរ៉ុកកែតទេ អ្នកអាចចូលមើលសន្លឹកណែនាំពីរបៀបធ្វើនៅក្នុងសកម្មភាព ល្បែងធ្វើរ៉ាកែតវាយសី បានផងដែរ។
កម្រិតសិក្សា ៖ ទាប មធ្យម និងខ្ពស់
ការរៀបចំ ៖ ត្រៀមសម្ភារទាំងអស់សម្រាប់លេងល្បែងនេះជាមួយកុមារ។
សេក្ដីណែនាំ៖
- ប្រាប់កុមារថាថ្ងៃនេះពួកគេនឹងលេងកីឡាមួយប្រភេទដែលមានឈ្មោះថា កីឡាវាយសី ដោយប្រើកូនបាល់ (បាល់ជ័រ ឬកៅស៊ូក៏បាន)។
- សួរពួកគេថា ធ្លាប់បានលេងកីឡានេះពីមុនមកដែរឬទេ? លេងនៅទីណា? លេងជាមួយអ្នកណា?
- ចាប់ផ្ដើមបែងចែកកុមារជា២ក្រុម ឬបីក្រុមទៅតាមចំនួនសិស្សក្នុងថ្នាក់។
- ត្រៀមរ៉ាកែត២ ឬ៣ ទៅតាមក្រុមដែលបានបែងចែក (ប្រសិនបើមាន៣ក្រុម រ៉ាកកែត៣ដែរ) កូនបាល់មួយចំនួននិងកន្រ្តក២ ឬ៣ តាមក្រុមដែលមានដូចគ្នា។
- រៀបចំកន្លែងដាក់កន្រ្តក២ ឬ៣កន្លែង។ កន្រ្តក២សម្រាប់ដាក់កូនបាល់និង២ទៀតសម្រាប់វាយបញ្ចូល។
- ក្មេងៗត្រូវនៅជាក្រុមដែលបានបែងចែករួច
- ពន្យល់ក្មេងៗពីរបៀបលេងឱ្យបានច្បាស់ជាមុនសិន មុននឹងលេង
ប្រសិនបើលេងជាក្រុម និងមានគ្នាច្រើនល្មម៖
- យកក្មេងម្នាក់ពីក្រុមនីមួយៗ ដើម្បីចាប់ផ្ដើមលេងល្បែងនេះ
- ក្មេងៗក្នុងក្រុមនីមួយៗត្រូវប្រណាំងគ្នាវាយបាល់ឱ្យចូលក្នុងកន្រ្តកដែលបានរៀបចំដាក់នៅខាងមុខ
ខ្លួនឱ្យបានច្រើនតាមដែលអាចធ្វើទៅបាន។
- អ្នកគ្រូ ឬលោកគ្រូត្រូវកំណត់នាទីក្នុងការលេងម្ដង អាចថា១ឬ២នាទីក៏បានដែរ ទៅតាមការកំណត់ និងពេលវេលារបស់អ្នក។
- ក្មេងក្នុងក្រុមនីមួយៗមានសិទ្ធិក្នុងការវាយកូបបាល់តែ១ដងទេ និងត្រូវប្ដូរវេនទៅក្មេងក្នុងក្រុមបន្ទាប់ ហើយលេងបែបនេះរហូតដល់អស់នាទីដែលបានកំណត់ខាងលើ។
- នៅពេលដែលគ្រប់នាទីដែលបានកំណត់នោះ អ្នកត្រូវស្រែកថា ‹‹ឈប់›› បន្ទាប់មករាប់ចំនួនកូនបាល់ដែលក្មេងបានវាយចូលនោះ។
- ក្រុមណាដែលទទួលបាននកូនបាល់ច្រើនជាង ក្រុមនោះនឹងក្លាយក្រុមដែលឈ្នះតែម្ដង
- ប្រសិនបើអ្នកមានពេលវេលាគ្រប់គ្រាន់ សូមឱ្យក្មេងៗលេងបានគ្រប់គ្នាកាន់តែល្អ។
- នៅពេលលេងល្បែងនេះរួចរាល់ហើយ អ្នកអាចចែកកូនបាល់ទៅឱ្យពួកគេក៏បានដែរ និងឱ្យពួកគេជួយរៀបចំកន្លែងលេងល្បែងឱ្យបានស្អាតនិងមានរបៀបរាបរយ។