< ត្រឡប់ទៅធនធានទាំងអស់

ល្បែងប្រកួតសាងសង់ជាមួយគម្របដប

15-30 នាទី

២ ​នាក់លើស

៣ឆ្នាំ លើស

គម្របដប

អង្គការរុឺម៉កកង់បីសម្រាប់កុមារ

• សិក្សាសង្គម
• ភាសាខ្មែរ

ល្បែង ប្រកួតសាងសង់ជាមួយគម្របដប

សិក្សាសង្គម (គំនូរ និងសកម្មភាពកសាង)៖ ការយល់ដឹង និងការពេញចិត្តចំពោះសិល្បៈតាមរយៈការបងបង្កើតរូបភាព

ភាសាខ្មែរ (ការស្ដាប់)៖ ស្ដាប់គេនិយាយ និងមានសមត្ថភាពស្ដាប់ដោយធ្វើតាមការណែនាំងាយៗ។

គោលបំណង

សិក្សាសង្គម ៖ រហ័សរហួនឈ្លាសវៃ និងបុិនប្រសប់ក្នុងការចាប់កាន់ បត់ សូន គូរ ហែក និងផាត់ពណ៌ឱ្យមានសោភ័ណ។ 

ភាសាខ្មែរ ៖ ប្រាប់បានពីសូរសម្លេងផ្សេងៗនៅក្ន្នុងបរិស្ថាន។

រយៈពេល ៖ ៣០ នាទី 

ឧបករណ៍ ៖ គម្របដបមួយចំនួន

កម្រិតសិក្សា ៖ មធ្យម និង ខ្ពស់ 

ការរៀបចំ ៖ ត្រៀមគម្របដប២ឈុតសម្រាប់ក្រុមនីមួយៗ ដែលមួយឈុតមាន ១៥  ឬ ២០ គម្របដប 

សេក្ដីណែនាំ៖ 

1. និយាយទាក់ទងទៅនឹងជនពិការភ្នែក។ ពិភាក្សាគ្នាពីការធ្វើអ្វីមួយដោយមើលមិនឃើញ។ 
2. បង្ហាញក៏ដូចជាពន្យល់ក្មេងថា ថ្ងៃនេះពួកគេទាំងអស់នឹងត្រូវធ្វើការជាគូរៗពីរនាក់ ដោយធ្វើជាពិការភ្នែក និងប្រាប់ដៃគូរឱ្យធ្វើអ្វីមួយដោយគ្រាន់តែនិយាយប្រាប់តាមសម្លេង។
3. បែងចែកក្មេងៗទៅជាគូរៗឱ្យហើយ ដើម្បីមានការងាយស្រួលក្នុងការលេងល្បែងនេះ។ 
4. ពន្យល់ក្មេងៗពីល្បែងសកម្មភាពនេះឱ្យបានច្បាស់។

• ចែកក្មេងៗជាក្រុមនីមួយៗ (១ក្រុមមានពីរនាក់) ។
• ក្មេងទី១ អង្គុយចុះដែលមានគម្របដបមួយឈុតនៅចំពីមុខ ។
• ក្មេងទី២ អង្គុយចុះដូចគ្នា តែត្រូវបែរខ្នងដាក់គ្នា ហើយមានគម្របដប
  នៅពីមុខដូចគ្នា។ 
• ក្មេងទី១ (ត្រូវធ្វើការសម្រេចចិត្តថាឱ្យក្មេង ទី១ ឬ ទី២ ជាអ្នកចាប់ផ្ដើមនិយាយមុន) ចាប់ផ្ដើមរៀបគម្របដបរបស់ខ្លួនជារាងអ្វីក៏បានដែលខ្លួនស្រឡាញ់ចូលចិត្ត បន្ទាប់មកនិយាយប្រាប់ទៅក្មេងទី២ ឱ្យរៀបគម្របដបរបស់គេឱ្យដូចទៅនឹងក្មេងទី១ដែរដោយមិនអនុញ្ញាតឱ្យមើលគ្នានោះទេ (ល្បែងនេះលេងម្ដងបានតែមួយក្រុមទេ មានន័យថាម្ដង២នាក់) ។
• ក្នុងមួយរូបភាព ក្មេងដែលត្រូវធ្វើតាមដៃគូនោះ គឺមានឳកាសធ្វើតាមតែ១ដងតែប៉ុណ្ណោះ បើលើសពីមួយដងនឹងចាត់ទុកថាជាមោឃៈ។
• ក្មេងៗដែលនៅកន្លែងទាំងអស់ប្រាប់ពួកគេឱ្យនៅស្ងៀម មិនគួរមាត់ មិនគួរប្រាប់ទេ ។
• នៅពេលដែលសាងសង់រួចហើយ ក្មេងទាំង២ត្រូវផ្លាស់ប្ដូរកន្លែងគ្នា នឹងអាចមើលរូបភាពថាដូចគ្នាដែរឬទេ? 
• ក្រុមណាដែលសាងសង់រូបភាពដូចគ្នាបាន គឺជាក្រុមដែលអស្ចារ្យ ហើយទះដៃអបអរសាទរឱ្យពួកគេផង។ 

5. មុននឹងលេងសូមអ្នកហៅក្មេងណាម្នាក់ មកលេងសាកល្បងឱ្យពួកគេទាំងអស់គ្នាបានមើលឱ្យច្បាស់ជាមុនសិន។
6. ក្មេងដែលនៅក្នុងក្រុមអាចសួរគ្នា ដើម្បីឱ្យច្បាស់ពីការធ្វើរូបភាពរបស់ពួកគេបានដោយសេវី។