< ត្រឡប់ទៅធនធានទាំងអស់
ល្បែងធ្វើរ៉ាកែតវាយប៉េងប៉ុង
-
ចិត្តចលភាព -
សិក្សាសង្គម -
បុរេគណិត
សកម្មភាព ៖ ល្បែងធ្វើរ៉ាកែតវាយប៉េងប៉ុង
ចិត្តចលភាព៖បំណិនចលនាតូច៖ការហ្វឹកហាត់បង្កើនកម្លាំងសម្របសម្រួលរវាងចលនាសាច់ដុំដៃនិងសាច់ដុំភ្នែក។
សិក្សាសង្គម៖ គំនូរនិងសកម្មភាពកសាង៖ ការយល់ដឹង និងពេញចិត្តចំពោះសិល្បៈតាមការបង្កើតរូបភាព៖
បុរេគណិត៖ រង្វាស់រង្វាល់៖ បញ្ញបតិ្តស្ដីពីរង្វាស់រង្វាល់៖ បញ្ញតិ្តនៃរូបរាងនិងលំហ។
គោលបំណង ៖
ចិត្តចលភាព៖ មានអំណត់ តស៊ូព្យាយាមនិងសប្បាយរីករាយក្នុងការធ្វើអ្វីមួយ ឬលេងល្បែងឱ្យបានរឹងមាំ និងជោគជ័យ។
សិក្សាសង្គម៖ ប្រាប់បានពីរបៀបនៃការបត់ រោយ ដេរ ត្បាញ សូនរូប គូរ ផាត់ពណ៌ ហែក កាត់ បិទ បត់… ដើម្បីបង្កើតជារូបភាពផ្សេងៗ។ ធ្វើឱ្យក្មេងៗមានសកម្មភាព រហ័សរហួននិងប្រុងប្រយ័ត្នក្នុងការចាប់កាន់ បត់ សូន គូរ ហែកនិងផាត់ពណ៌ជាដើម…។
បុរេគណិត ៖ ប្រាប់បានពីរូបរាងសាមញ្ញពីធរណីមាត្រដូចជា៖ រូបរាងការេ ត្រីកោណ រង្វង់ និងចតុកោកែងជាដើម…។
រយៈពេល ៖ ៣០ នាទី
ឧបករណ៍ ៖ ក្រដាសកេះ ឬ ក្រដាសអ្វីដែលមានសភាពរឹងល្មម កន្រ្តៃ ស្កុត។
កម្រិតសិក្សា ៖ មធ្យមនិងខ្ពស់
ការរៀបចំ ៖ រៀបចំធ្វើរុកកែតមួយឈុតសម្រាប់បង្ហាញកុមារជាមុនសិន។
សេក្ដីណែនាំ៖
- ប្រាប់កុមារថាថ្ងៃនេះ ពួកយើងនឹងលេងល្បែងមួយដែលមានឈ្មោះថា ល្បែងធ្វើរុកកែតវាយប៉េងប៉ុង។
- សួរកុមារថា តើកូនៗស្គាល់កីឡាវាយប៉េងប៉ុងដែរឬទេ? ធ្លាប់លេងកីឡាហ្នឹងដែរឬទេ?
- កូនៗបានមើលការប្រកួតកីឡា នៅក្នុងព្រឹត្តិការណ៍ ស៉ីហ្គេមឆ្នាំ២០២៣ដែរឬទេ? តើនៅក្នុងស៉ីហ្គេមមានកីឡាវាយប៉េងប៉ុងដែរឬទេ?
- បន្ទាប់មកបង្ហាញពីរុកកែតមួយឈុតដែលបានធ្វើនិងត្រៀមនោះ ទៅកាន់កុមារមុនពេលធ្វើវាទាំងអស់គ្នា។
វិធីធ្វើ៖
- ប្រើកន្រ្តៃកាត់ក្រដាសកេះជារាងរង្វង់ចំនួន២ (សម្រាប់មួយឈុត)
- កាត់ក្រដាសកេះមួយផ្សេងទៀត បកយកស្រទាប់ខាងលើ (ឬប្រើក្រដាសកេះណាដែលមានសភាពទន់ ដើម្បីងាយស្រួលក្នុងការមូរវាជាទីប) សម្រាប់ធ្វើជាដងរបស់វា។ ត្រូវមូរវាជារាងទីប កុំស្ដើងពេកនិងកុំក្រាស់ពេក គឺល្មមបានហើយ។
- បន្ទាប់មកពុះវានៅចំកណ្ដាលនិងដាក់វាគាបនៅចន្លោះក្រដាសកេះដែលយើងបានកាត់ជា
រង្វង់នោះ បន្ទាប់មកទៀត ប្រើស្គុតបិទវាទាំងសងខាងឱ្យមានសភាពរឹងមាំជាការស្រេច។
- ធ្វើបែបនេះសម្រាប់រុកកែតទាំងអស់តែម្ដង។
- ពេលធ្វើរួចរាល់អាចឱ្យក្មេងៗលេងកីឡាវាយប៉េងប៉ុងនេះបាន ប្រសិនបើមានគ្រាប់របស់វា។
- ពួកគេអាចប្រើប៉ោងប៉ោងធ្វើគ្រាប់ក្នុងការលេងល្បែងនេះក៏បានដែរ ដែលមានទំហំទៅតាមការរៀបចំរបស់អ្នក។